طريقه سحريه اسمها تعدد النيه ♥

من طرف aya khaled الأربعاء 06 فبراير 2013, 11:06 pm

السلام عليكن ورحمه الله وبركاته
حبيباتى فى الله
♥ ♥ ♥ ♥ ♥ ♥ ♥

عندى ليكم النهارده طريقه جديده زى السحر

سحر يخلى جوزك بيحبك طول الوقت

ويخلى اولادك زى مابتتمنى يكونوا واكتر

ويلين قلب كل انسان قاسى عليكى

ويخلى كل الناس تحبك وتقدرك

سحر يخليكى طول الوقت عداد حسناتك مش بيقف

ويخليكى تاخدى اجر واتنين وتلاته على العمل الواحد

عارفه ايه اللى هيخلى حياتك تتعدل وتكون زى مابتتمنى

اكيد رضا ربنا علينا تخيلوا رب العباد راضى عننا يبقى العباد اللى قلوبها فى ايده سبحانه يقلبها كيف يشاء مش هتبقى بتحبنا وراضيه علينا ؟؟

السر بقى اللى عاوزه اقولكم عليه هو :-

تعدد الـــــــــــنــــــــــــــــــــيـــــــــــــــ ـــــه

ايوا يابنات النيه

مش رسولنا الكريم قال انما الاعمال بالنيات ؟؟

عن أمير المؤمنين أبي حفص عمر بن الخطاب رضي الله عنه ، قال : سمعت رسول الله صلى الله عليه وسلم يقول : ( إنما الأعمال بالنيّات ، وإنما لكل امريء مانوى ، فمن كانت هجرته إلى الله ورسوله ، فهجرته إلى الله ورسوله ، ومن كانت هجرته لدنيا يصيبها ، أو امرأة ينكحها ، فهجرته إلى ما هاجر إليه ) رواه البخاري ومسلم في صحيحهما .

طيب كلنا عارفين الكلام ده كويس وحافظين الحديث ده انا هنا علشان اتكلم على تطبيقه فى حياتنا

يعنى مثلا كلنا اكيد بنام
بتنامى ليه بقى ؟؟
علشان تعبانه طول اليوم
علشان ورايا شغل بكره
علشان ورايا مشوار مهم اقوم اعمله
علشان اودى عيالى المدرسه
علشان اقوم افطر جوزى

طيب كل اللى بتعمليه ده أخدتى على انك بتعمليه واجب وعاده ويوم بيجر التانى

تعالوا بقى نشوف تطبيق مفهوم تعدد النيه على نفس المثال
بتنامى ليه ؟؟
بنام علشان ربنا يقوينى واقدر اصحى للفجر
بنام علشان ارتاح واريح جسمى علشان اقدر على العباده لتانى يوم
بنام علشان اقوم احضر الفطار لجوزى علشان اطيع ربنا فيه وربنا يرضى عنى برضاه
بنام علشان اودى ولادى المدرسه علشان يبقى جيل مسلم متعلم وقوى يعمل حاجه للاسلام
بنام علشان اصحى اسعى لرزقى بالحلال واكفى بيتى واولادى وكل لقمه بأكلها ليهم ليا بيها اجر عند الله

وهكذا على اد شطارتك ووعيك بقى عددى فى نيتك شوفى كده خدتى كام اجر
بالمقابل بقى هتلاقى فعلا ربنا قواكى وصحيتى للفجر هتلاقى جوزك راضى عنك هتلاقى ولادك كويسين اوى هتلاقى ربنا ميسرلك كل امورك
ليه لانك انتى اصلا فى نيتك بتعمليها كلها لوجهه ولارضاؤه فااكيد ربنا كمان هيرضيكى

تعالوا على مثال تانى
صاحين ع الصبح عمالين نروق ونمسح ونكنس ونطبخ ونغسل ونربى فى العيال ونحايل فى الازواج وياسلام بقى لو ست بتشتغل وجايه من شغلها تعمل ده كله وياسلام كمان لو حماتها معاها وبعد ماتخلص ده كله هتنزل تخدمها لالالالا ده انا كده مش هلاقى نفسى
وهتتنرفزى وتزعلى وتشتكى وفى الاخر هتعملى هتعملى انتى مضطره وفى الاخر محدش بيقدر

لا تعالى هنا بقى اما اقولك ربنا بيقدر تعبك اوووى وخصوصا لو كان فى طاعته

هقوم اروق بيتى وانضفه علشان يكون بيت يليق بالمسلمين اللى عايشين فيه وبدينا اللى فى كل امورنا بيحثنا على النضافه والطهاره
وعلشان بيتى يكون جو مناسب ومهيأ لاولادى اللى بيذاكروا ولجوزى اللى بييجى من شغله تعبان ييجى يلاقى منظر يسر عنيه مش يأذيه

بنطبخ وبنعمل الاكل ليه علشان ارضى ربنا فى زوجى واولادى
وعلشان كل اكله بعملها وكل لقمه بياكلوها ليا بيها حسنه لو احتسبت تعبى ده عند ربنا
وعلشان نكون فينا مجهود نعبد ربنا ونطيعه ونصلى ونصوم ونقيم الليل ومنضعفش
وعلشان نطلع جيل مسلم قوى فى عقله وجسمه
علشان اولادنا دول نعمه ربنا ادهالنا فاانا بحافظ على النعمه وبراعيها واكبرها

هتيجى بعد يوم دوخه وتعب وجوزك نور البيت
يبقى هتجمل لزوجى علشان اعفه بالحلال وابعده عن الحرام
هتجمل ليه علشان ميشوفش منى اى حاجه تأذيه
هتجمل علشان يغض بصره عن اللى برا البيت
هكلمه واعامله بالحسنى وابتسم فى وشه علشان احسسه بمعنى السكن والراحه اللى ربنا قال عليه
كل امورك مع زوجك احتسبيها لربنا حتى اشدها خصوصيه
لانك بترضى ربنا برضا زوجك وبتعفيه بالحلال وبتبعديه عن اى ضغط ممكن يوقعه فى الحرام
حتى لو بتتمنى الحمل
خلى نيتك انك عاوزه تكونى بيت مسلم واسره مسلمه
عاوزه تزيدى من عدد المسلمين
عاوزه يكون لك ولد صالح فى حياتك وبعد مماتك

نيجى بقى لحماتك وخدمتها
هنقول كان الله فى عون العبد مادام العبد فى عون اخيه
هنقول احنا بنتصدق عن صحتنا وجسمنا وسعادتنا بالخدمه اللى بنخدمها ليها
هنقول اننا هنعاملها بما يرضى الله علشان ربنا يخلى اولادى يعاملونى بما يرضى الله
هرضى الله فيها دى ست زى والدتى وحتى ان كان فى اى مشاكل عليا انا الاستحمال
حتى لو زعلتك وجرحتك واذتك احتسبيه عند الله وقولى ربنا علمنا العفو والرحمه اكظمى غيظك علشان تكونى من الكاظمين الغيظ
علشان لما اشيلها فى كبرها فى السن واستحملها علشان الاقى اللى قلبه يحن عليا ويستحملنى لما اكون زيها
علشان هى ليها فضل عليا لانها ربتلى راجل اتجوزه ومهما كانت مش جزاءها النكران والعداوه

طيب ومامتك لما بتروحى تخدميها هتقولى ايه لا دى امى
انا بخدمها بحب وافديها بعيونى ماشى ياحبيبتى مقولناش حاجه بس عددى نيتك ارضى امك وخدى حسنات وخلى وقتك كله طاعه لله

نيجى مثلا لو هتروحى تزورى مريض
غالبا كلنا بيروح يرد الزياره ولا علشان واجب
طب ليه ميكونش ادخال سرور على قلب مسلم
كان الله فى عون العبد مادام العبد فى عون اخيه
نلتمس اجر زياره المريض اللى ربنا وعدنا بيه
علشان نتعظ من المرض وان الانسان مهما كان ضعيف وممكن فى اى وقت اكون مكانه
اتبسم فى وجهه واقوله كلمتين يدخلوا جوه قلبه الامل ده التبسم فى وجه اخيك صدقه والرحمه من صفات الله

طيب نيجى لعبادتك مع ربنا
مثلا هنصوم اتنين وخميس ولا 3 ايام من كل شهر
اولا سنه عن الحبيب المصطفى وربنا قال اننا ناخده قدوه حسنه
ثانيا علشان ربنا يباعد بينا وبين النار مسيره 70 خريفا
ثالثا علشان نزكى على صحتنا اللى ربنا مقدرنا بيها على الصيام
رابعا علشان نهذب انفسنا بالصيام ونزهد فى الدنيا وملذاتها
خامسا علشان نرضى ربنا وعلشان نعوض الوقت اللى راح وكنا فيه فى غفله
وياسلام لو اتنين والخميس جه مع ايام 13 او 14 او 15 كده هنصوم يوم الاتنين او الخميس سنه وهو هواه صيام يوم من ال 3 ايام
وياسلام لو خليت نيتى علشان ابقى قدوه لاصحابى او للى فى البيت فيغيروا ويعملوا زييى والدال على الخير كفاعله
وياسلام لو قولتى علشان اعود اولادى يطلعوا يعملوا زييى

طيب نيجى لقيام الليل
هقيم الليل علشان سنه عن الرسول
علشان اكون قريبه لربنا واصلى والناس نيام
علشان ادعى وربنا يستجيب ليا
علشان اتوب لربنا وميبقاش غضبان عليا
علشان اشد اهلى ولا اصحابى ولا جوزى ونبقى متجمعين فى طاعه الله
علشان اشتكى لربنا وارمى حمولى عليه وانسى همومى
علشان يكون عمل اتقرب بيه من ربنا وادخل بيه الجنه
علشان اعوض كل اللى فاتنى وانا بعيد عن ربنا

طيب نيجى لاذكار الصباح والمساء والاستغفار والتسبيح وذكر الله ككل
هنقول علشان ربنا يحفظنا ويحصنا وميبقاش الشياطين ليهم تأثير علينا
وعلشان ميمسناش هم ولا غم ولا حسد
وعلشان يبقى ذكر الله دايما على لسانى
وعلشان اعيش عليها فلما اموت اموت عليها
علشان ذكر الله يرزقنا حياه القلوب
علشان كل ذكر وكل كلمه يثقلوا ميزان حسناتى
علشان مااسيبش دقيقه تفوت منى من غير مااكون مستفيده بيها وواخده حسنه
علشان يومى كله يبقى لله وفى طاعه الله
وتكون وسيله اتقرب بيها لله

نيجى للقرأن
انا بقرأ القرأن علشان ده رساله ربنا لينا
علشان افهم معانيه واتعظ منه واخده دليل لحياتى ولتصرفاتى
علشان اتعلمه واعمله لاولادى
علشان مااكونش من الهاجرين لكتاب الله
علشان كل حرف بحسنه والحسنه بعشر امثالها والله يضاعف لمن يشاء
علشان اكون ماهره فيه واكون مع السفره الكرام
علشان يكون ونيسى فى قبرى
علشان يدخلنى الجنه ويشفع لى عند ربنا
علشان لو عملته لاولادى هيكون صدقه جاريه ليا حتى بعد مماتى
علشان اكون شايله جزء من كلام ربنا فى قلبى

نيجى للصدقه
خذ من اموالهم صدقه تطهرهم وتزكيهم
الصدقه تطفىء غضب الرب
الصدقه بتكون لربنا قبل مابتكون فى ايد المحتاج
الصدقه بندفع بيها بلاء ممكن يحصلنا
الصدقه بنزكى بيها عن اموالنا وصحتنا واهلنا
الصدقه طريقه مثلى للتقرب من ربنا
الصدقه كان الله فى عون العبد مادام العبد فى عون اخيه
الصدقه ولو بمبلغ بسيط باب من ابواب رضوان الله
الصدقه رحمه والرحمه صفه من صفات رب العباد
الصدقه متعه العطاء وترك للشح والبخل
الصدقه ربنا بيردهالك اضعاف اضعاف سواء فى رفع بلاء او فى صحه او فى اهلك او فى المال

نيجى لصله الرحم
احنا بنقرب لربنا وبرضيه بصله الرحم
بندفع الشر والمشاكل بصله الرحم
بندخل السرور على قلب اهالينا بصله الرحم
لو فى مشكله ولا حاجه خيركم من يبدء بالسلام

نيجى للنت
احنا داخلين على فتكات مش علشان نقضى وقت
ولا داخلين على الفيس علشان نلعب
احنا داخلين نستفاد
نكتب موضوع يكون صدقه جاريه لينا
نرفع دعاء ولا استغفار ناخد بيه حسنات
نقرأ حاجه مفيده تعينا على دنيتنا واخرتنا
منخليهوش طريقه لتضيع الوقت
لا احنا نستفاد منه الى اقصى دررجه
ونخليه يجبلنا حسنات اضعاف اضعاف ماهياخد من وقتنا
داخله تنصحى واحده بنصيحه خير
داخله تفوقى واحده وتدليها على طريق الخير

وهكذا ياجماعه كل حاجه فى حياتنا وكل نفس بنتنفسه ممكن يكون لينا وممكن يكون علينا
وتعدد النيه ليست سوى تجاره مع الله
العمل الواحد هناخد عليه اجر عمل واتنين وتلاته واربعه
انا مجرد اديتكم بعض امثله أسأل الله ان يكون وفقنى فيها
لكن طول اليوم عندك وفى كل حاجه مهما كانت بسيطه عددى نيتك
وابتكرى نيه جديده فى الخير تاخدى عليها اجر جديد
علمى اولادك وعلمى اللى حواليكى وخدى ثوابهم الدال على الخير كفاعله
عاوزين وقتنا كله لله وحياتنا كلها فى طاعه الله
وابشرى بالتغيير اللى هتلاقيه فى حياتك وفى اسرتك وفى اولادك
على اد نيتك ربنا هيعطيكى وادام هى لله فعمرك ماربنا هيخذلك

عاوزه اقولكم ان النيه محلها القلب يابنات
يعنى مش لازم اقول انا هعمل كذا علشان كذا وكذا
لا انتى خليها فى قلبك وانتى وربنا عارفين انتى بتعملى كده ليه

فتشوا على الحسنات وطلعوها
متسبيش ثواب ولا حسنه يعدوا منك ادام تقدرى تاخديهم
اطعمى فقير مسكين مش قادره اطعمى قطه ولا كلب ولا عصفوره
قولى كلمه طيبه مش هتخسرى حاجه
ابتسمى فى وش اختك المسلمه مش هتخسرى حاجه
بطلى غيبه ونميمه وكلام على الناس مش هتخسرى حاجه
فرحى قلب طفل غلبان مش هتخسرى حاجه
سامحى اللى ظلمك وخليكى من العافين عن الناس مش هتخسرى حاجه
ادعيلى وادعى لاخواتك فى الله بظهر الغيب مش هتخسرى حاجه
بالعكس انتى طول ماانتى مع ربنا اكيد كسبانه وهتلاقى تحول عجيب فى حياتك وفيكى انتى شخصيا
هتلاقى قلب اهدى وانقى ومش شايل للدنيا هم ولا فيه ذره حقد ولا غل ولا حسد ولا كبرياااء
ربى اولادك على فطره الانسان السليمه الطيبه متغيريهاش جواهم وعوديهم على التسامح والرحمه
هيفضلوا صدقه جاريه ليكى علشان هما كمان هيعلموا اولادهم زى ماانت علمتيهم

أسأل الله العظيم رب العرش العظيم ان يجمعنى واياكم فى الفردوس الاعلى
وأن يتقبل منا ومنكم صالح الاعمال
[center]