لكل شاب لا للشتيمة

بصوا بقي كلمتين مهميييييييين يا رجااااالة ^_^

بعد تفكير لقيت ان أول "قعدة رجالة" مع بعض لازم تكون عن الشتيمة! حاول تقرا للأخر و متهربش من مواجهة نفسك، و خلينا نتفق انها قعدة رجالة فعلا.
أولا الناس اللى بتشتم على طول دى نوعين :
-نوع ميعرفش حجم الموضوع و تصنيفه و لا يعرف الموضوع ده محطوط ف خانة ايه، و ده هنعرفه.
-نوع تانى عارف كل حاجة بس عامل هندى (مع ان الهنود مبيشتموش زينا كده xD)
احتمال تكون بتقول "ده هزار"، "انتو اللى معقدين"، "هو أنا بعمل جريمة ولا بسرق"، حلو أوى، طب تعرف ان ف الدين الحاجة اللى مستهون بيها دى من "أكبر الكبائر"، الحديث أهو لو مكنتش سمعته قبل كده :
"إن من أكبر الكبائر أن يلعن الرجل والديه قيل : يا رسول الله فكيف يلعن الرجل والديه ؟
قال : يسب أبا الرجل فيسب أباه ويسب أمه فيسب أمه"
يعنى تشتم واحد بأهله يقوم شاتمك بأهلك، و تيجى تقول ده هزار! يعنى عشان تهزر تعمل حاجة من الكبائر؟!!
غير كده ازاى بتقبلها كراجل كده و عادى أمك تتشتم بأقذر الألفاظ اللى تخطر على بال حد و انت تقابل كده بأعرض ابتسامة تقدر عليها بعد ما تردله "النكتة"! يا راجل مش مكسوف على دمك!
لو مقتنعتش بالكلام ده من وجهة نظر الدين ولا من وجهة نظر انك راجل اعرف ان عندك مشكلة كبيرة لازم تحاول تصلحها.
(لو جيه يوم و بقيت أشتم و أتقبل شتيمة الأهل بصدر رحب كده لازم أراجع نفسى ساعتها ف كلمة راجل دى! و ده ان شاء الله مش هيحصل)
...